Kundesentrert publisering – masterclass med Gerry McGovern oppsummert

“We – Are – Not – The – Centre – Of – The – Universe. The – Customer – Is”
Ja, men alle har jo det som utgangspunkt, i alle fall dei fleste.

Øyvind Litlere i Bouvet hadde eit interessant innlegg på Los-seminar i Førde 15. april der han fortalde om utvikling av nye nettsider i Bergen kommune og bruken av Los.

Utgangspunktet for dei nye nettsidene var at brukaren skulle stå i sentrum (!) og alle var einige om det. Men då det kom til stykket og informasjonen skulle fyllast inn, kom innvendingane fort: “Ja, men det er jo ikkje slik me er organiserte!”.

Det nyttar altså lite å snakka om det, og ha det som ein overordna ide, eller reisa seg og framføra det høgt, kollektivt. Det er i møtet med den aktuelle informasjonen og i utforminga av brukardialogane dette må bankast inn, og det trengst verktøy og strukturar som støttar det (Los er eit eksempel på ein brukarorientert presentasjon av offentlege tenester).